Mahābhārata Reader

नृगेण यजमानेन सोमेनेह पुरंदरः । तर्पितः श्रूयते राजन्स तृप्तो मदमभ्यगात् ॥

इह देवैः सहेन्द्रैर्हि प्रजापतिभिरेव च । इष्टं बहुविधैर्यज्ञैर्महद्भिर्भूरिदक्षिणैः ॥

आमूर्तरयसश्चेह राजा वज्रधरं प्रभुम् । तर्पयामास सोमेन हयमेधेषु सप्तसु ॥

तस्य सप्तसु यज्ञेषु सर्वमासीद्धिरण्मयम् । वानस्पत्यं च भौमं च यद्द्रव्यं नियतं मखे ॥

तेष्वेव चास्य यज्ञेषु प्रयोगाः सप्त विश्रुताः । सप्तैकैकस्य यूपस्य चषालाश्चोपरि स्थिताः ॥

तस्य स्म यूपान्यज्ञेषु भ्राजमानान्हिरण्मयान् । स्वयमुत्थापयामासुर्देवाः सेन्द्रा युधिष्ठिर ॥

तेषु तस्य मखाग्र्येषु गयस्य पृथिवीपतेः । अमाद्यदिन्द्रः सोमेन दक्षिणाभिर्द्विजातयः ॥

सिकता वा यथा लोके यथा वा दिवि तारकाः । यथा वा वर्षतो धारा असंख्येयाश्च केनचित् ॥

तथैव तदसंख्येयं धनं यत्प्रददौ गयः । सदस्येभ्यो महाराज तेषु यज्ञेषु सप्तसु ॥

भवेत्संख्येयमेतद्वै यदेतत्परिकीर्तितम् । न सा शक्या तु संख्यातुं दक्षिणा दक्षिणावतः ॥

हिरण्मयीभिर्गोभिश्च कृताभिर्विश्वकर्मणा । ब्राह्मणांस्तर्पयामास नानादिग्भ्यः समागतान् ॥

अल्पावशेषा पृथिवी चैत्यैरासीन्महात्मनः । गयस्य यजमानस्य तत्र तत्र विशां पते ॥

स लोकान्प्राप्तवानैन्द्रान्कर्मणा तेन भारत । सलोकतां तस्य गच्छेत्पयोष्ण्यां य उपस्पृशेत् ॥

तस्मात्त्वमत्र राजेन्द्र भ्रातृभिः सहितोऽनघ । उपस्पृश्य महीपाल धूतपाप्मा भविष्यसि ॥

स पयोष्ण्यां नरश्रेष्ठः स्नात्वा वै भ्रातृभिः सह । वैडूर्यपर्वतं चैव नर्मदां च महानदीम् । समाजगाम तेजस्वी भ्रातृभिः सहितोऽनघः ॥

ततोऽस्य सर्वाण्याचख्यौ लोमशो भगवानृषिः । तीर्थानि रमणीयानि तत्र तत्र विशां पते ॥

यथायोगं यथाप्रीति प्रययौ भ्रातृभिः सह । ददमानोऽसकृद्वित्तं ब्राह्मणेभ्यः सहस्रशः ॥

देवानामेति कौन्तेय तथा राज्ञां सलोकताम् । वैडूर्यपर्वतं दृष्ट्वा नर्मदामवतीर्य च ॥

संधिरेष नरश्रेष्ठ त्रेताया द्वापरस्य च । एतमासाद्य कौन्तेय सर्वपापैः प्रमुच्यते ॥

एष शर्यातियज्ञस्य देशस्तात प्रकाशते । साक्षाद्यत्रापिबत्सोममश्विभ्यां सह कौशिकः ॥

चुकोप भार्गवश्चापि महेन्द्रस्य महातपाः । संस्तम्भयामास च तं वासवं च्यवनः प्रभुः । सुकन्यां चापि भार्यां स राजपुत्रीमिवाप्तवान् ॥

कथं विष्टम्भितस्तेन भगवान्पाकशासनः । किमर्थं भार्गवश्चापि कोपं चक्रे महातपाः ॥

नासत्यौ च कथं ब्रह्मन्कृतवान्सोमपीथिनौ । एतत्सर्वं यथावृत्तमाख्यातु भगवान्मम ॥